მართლმადიდებელი ეკლესია 17 მაისს მაცხოვრის ამაღლებას დღესასწაულობსმაისი 16, 2018

მართლმადიდებელი სამყარო ხვალ უფლის ამაღლების დღესასწაულს ზეიმობს. დღესასწაულთან დაკავშირებით ტაძრებში სადღესასწაულო წირვა-ლოცვა ჩატარდება.

როგორც „ინტერპრესნიუსს“ საპატრიარქოდან აცნობეს, სრულიად საქართველოს კათოლიკოს-პატრიარქი, უწმინდესი და უნეტარესი, ილია მეორე მღვდელმთავრებთან და სასულიერო პირებთან ერთად საღმრთო ლიტურგიას სამების საკათედრო ტაძარში ხვალ, 10:00 საათზე, დაიწყებს.

ასევე, წირვის დასრულების შემდეგ, საყოველთაო ჯვრისწერა შედგება. წყვილებს ჯვარს ტაძრის მღვდელმსახურები დაწერენ. ჯვრისწერის შემდეგ კი მათ სრულიად საქართველოს კათოლიკოს–პატრიარქი, ილია მეორე დალოცავს.

მოგვიანებით, ოჯახის სიწმინდის დღესთან დაკავშირებით კი უწმინდესი ტაძარში პარაკლისსაც გადაიხდის და ოჯახებს დალოცავს.

მართლმადიდებელი ეკლესია მაცხოვრის ამაღლების დღესასწაულს აღდგომიდან მე-40 დღეს, მეექვსე კვირის ხუთშაბათს ზეიმობს.

წმიდა სახარების მიხედვით, ქრისტე თავის მოწაფეებს აღდგომიდან 40 დღის განმავლობაში ეცხადებოდა და სასუფევლის შესახებ მოუთხრობდა.
აღდგომიდან მე-40 დღეს მოწაფეები გალილეიდან იერუსალიმში ერთ სახლში შეიკრიბნენ, სადაც მათ მაცხოვარი გამოეცხადათ. იესომ შეკრებილთ აღუთქვა, რომ მალე მოუვლენდა სულიწმიდას და უბრძანა, იერუსალიმი არ დაეტოვებინათ.
ქრისტემ შემდეგ ისინი ბეთანიის მიმართულებით გაიყვანა და ელეონის მთაზე ამაღლდა. მანამდე უფალმა შეკრებილნი აკურთხა. ვიდრე მოწაფეები ცას შეჰყურებდნენ, თეთრად მოსილი ორი კაცი ეჩვენათ, რომლებმაც შეკრებილებს უთხრეს, რომ ასევე იხილავდნენ ზეციდან მომავალ უფალს.