საქართველოს საპატრიარქო – საქართველოს ეკლესიის პოზიცია უკრაინის შესახებ უცვლელიაოქტომბერი 8, 2018

საქართველოს საპატრიარქო უკრაინული მედიით გავრცელებულ ინფორმაციას ეხმაურება, რომლის მიხედვითაც საქართველოს ეკლესიამ მხარი დაუჭირა უკრაინის ეკლესიის ავტოკეფალიას და განმარტავს, რომ საქართველოს საპატრიარქოს პოზიცია კვლავაც უცვლელია:

“როგორც რუსულ, ისე უკრაინულ მედიაში პერიოდულად ჩნდება მიკერძოებული ინფორმაცია უკრაინის ეკლესიის ავტოკეფალიის საკითხთან მიმართებაში საქართველოს ეკლესიის პოზიციასთან დაკავშირებით და ორივე მხარე ცდილობს,  ჩვენი ნათქვამი სათავისოდ წარმოაჩინოს.

მსგავს ფაქტს  ჰქონდა ადგილი საქართველოს საპატრიარქოში უკრაინის რადას (პარლამენტის) თავმჯდომარის ვიზიტის შემდეგაც, – უკრაინულმა  არხებმა გაავრცელეს, თითქოს საქართველოს ეკლესიამ მხარი დაუჭირა უკრაინის ეკლესიის ავტოკეფალიას, რაც რეალობას არ შეესაბამება.

შეხვედრაზე სტუმარმა განაცხადა, რომ ისინი ესწრაფვიან უკრაინის ერთიანი ეკლესიის ავტოკეფალიის მოპოვებას, რომელიც როგორც ხელისუფალთა, ისე მიტროპოლიტ ონოფრეს დაქვემდებარებაში მყოფ და ყველა სხვა იერარქთა მოთხოვნაზე და კანონიკურ  საფუძველზე  უნდა  იყოს  დამყარებული.

თუ ეს განხორციელდა, ბუნებრივია, მისასალმებელი  მოვლენა იქნება, მაგრამ, როგორც ჩვენის მხრიდან აღინიშნა, ეს ადვილად მისაღწევი ამ ეტაპისთვის არ ჩანს; ამიტომაც აუცილებელია სიფრთხილე, რომ არ მოხდეს დაპირისპირება  მოსახლეობაში  და  არ  განვითარდეს კიდევ უფრო რთული პროცესები.

რაც შეეხება  საქართველოს ეკლესიის პოზიციას ზემოთ აღნიშნულ თემასთან დაკავშირებით, იგი არის უცვლელი და, როგორც ადრეც აღვნიშნეთ, გულისხმობს შემდეგს: – ვიდრე  საეკლესიო კანონიკის ნორმებზე  დამყარებულ  თავის საბოლოო ოფიციალურ გადაწყვეტილებას არ დააფიქსირებს  როგორც კონსტანტინეპოლის, ისე მოსკოვის საპატრიარქო, საქართველოს საპატრიარქო შეფასებებისაგან თავს შეიკავებს” – ნათქვამია საპატრიარქოს განცხადებაში.