პატრიარქი – დღეს განსაკუთრებული დღეა – ქართველი ერი ქართველი ხალხი, საქართველო ირჩევს პრეზიდენტსოქტომბერი 28, 2018

ჩვენ უნდა ვიცოდეთ, რომ სხვისი დამცირება არაფერს მისცემს ადამიანს. პირიქით, სხვისი ამაღლება აღგამაღლებთ თქვენც, – ასე გამოეხმაურა სრულიად საქართველოს კათოლიკოს-პატრიარქი ილია მეორე ქადაგებისას საქართველოში მიმდინარე წინასაარჩევნო მოვლენებს და საპრეზიდენტო კანდიდატების უხეშად მოხსენების ფაქტებს.

სამების საკათედრო ტაძარში საკვირაო ლიტურგიის დასრულების შემდეგ, უწმინდესმა მრევლს მიმართა და განაცხადა, რომ დღეს განსაკუთრებული დღეა, რადგან საქართველო ირჩევს პრეზიდენტს.

“დღეს განსაკუთრებული დღეა – ქართველი ერი ქართველი ხალხი, საქართველო ირჩევს პრეზიდენტს. ეს წინა დღეები მძიმე იყო არა მარტო მათთვის, ვინც იყო კანდიდატი პრეზიდენტობის, არამედ მძიმე იყო მთელი ერისთვის, ჩვენი ხალხისთვის. ხშირი შემთხვევა იყო, როდესაც უხეშად იხსენიებდნენ ერთმანეთს და ეს უნდა გავითვალისწინოთ მომავალში. ჩვენ უნდა ვიცოდეთ, რომ სხვისი დამცირება არაფერს მისცემს ადამიანს. პირიქით, სხვისი ამაღლება აღგამაღლებთ თქვენც.

მაცხოვარი ჩვენი ბრძანებს: “ითხოვდით და მოგეცეთ თქვენ”.

რა უნდა ვთხოვოთ უფალს? უნდა ვთხოვოთ სიმშვიდე, შვილების კეთილდღეობა.

წმინდა მამები ამბობდნენ: “ჰე უფალო მომანიჭე განცდაი თვისთა ცოდვათა და არა განკითხვა ძმისა ჩემისა”. უნდა დაინახოს ადამიანმა საკუთარი თავი. ძველი რომაელები ამბობდნენ: “შეიცანი თავი შენი”. უნდა შევიცნოთ თავი ჩვენი და არ უნდა დავინახოთ ან ნაკლებად დავინახოთ ნაკლი ჩვენი მოყვასის. უნდა დავინახოთ მისი კეთილი მხარე”, – ბრძანა უწმინდესმა.

პატრიარქის თქმით, დღეს საპატრიარქოში მათ დაანთეს სანთელი და შესთხოვეს უფალს, რომ უფალმა მშვიდობა მისცეს საქართველოს. ასევე, წაიკითხეს ფსალმუნიდან ერთ-ერთი კანონი.

“გადავშალე და გაიხსნა მე-14 კანონი. საოცარია, რომ ამ მე-14 კანონში არის თითქოს საქართველოს ცხოვრება, წარსული და მომავალი, განცდები და სიხარული. ეს საოცარი ფსალმუნები კიდევ ერთხელ მეტყველებს იმაზე, რომ უფალი ჩვენთან არის. უფალი მფარველობს საქართველოს,” – ბრძანა უწმინდესმა.

პატრიარქის თქმით, ეს კანონი არის წინასწარმეტყველება საქართველოს შესახებ. მან მიმართა მრევლს, ყოველდღე წაიკითხონ მე-14 კანონი.

ქადაგების შემდეგ პატრიარქმა წინასწარმომზალებული პურის სუფრა აკურთხა და განაცხადა, რომ ტაძარში მყოფს ყველას შეხვედროდა და სახლშიც წაეღოთ.